ലണ്ടന്‍: ഇംഗ്ലണ്ടില്‍ സ്ഥിരതാമസമാക്കിയിരിക്കുന്ന ഇന്ത്യന്‍ വംശജരും പാക് വംശജരുമായ പുരുഷന്മാര്‍ വിവാഹം ചെയ്യാനായി സ്വന്തം രാജ്യങ്ങളില്‍ നിന്നും സ്ത്രീകളെ കൊണ്ടുവരുന്നത് നിര്‍ത്തണമെന്ന് നിര്‍ദ്ദേശം. ഗ്ലാസ്‌ഗോയില്‍ ഒരു ഫാമിലി കൗണ്‍സിലിങ് സെന്റര്‍ നടത്തുന്ന ഷെയ്ഖ് ജമീല്‍ എന്ന പുരോഹിതനാണ് ഭാര്യമാരാക്കാന്‍ സ്വന്തം നാട്ടില്‍ നിന്നും സ്ത്രീകളെ ഇറക്കുമതി ചെയ്യരുതെന്ന് ആവശ്യപ്പെട്ടിരിക്കുന്നത്. ഇംഗ്ലണ്ടില്‍ ജനിച്ചുവളരുന്ന പാക് ഇന്ത്യന്‍ യുവാക്കള്‍ വിവാഹപ്രായമാകുമ്പോള്‍ വധുവിനെത്തേടി ഇന്ത്യയിലും പാകിസ്ഥാനിലും പോവുകയാണ് പതിവ്. കൂടുതല്‍ സംസ്‌കാരസമ്പന്നരും അടക്കവും ഒതുക്കവുമുള്ളവരുമായിരിക്കും സ്വന്തം നാട്ടിലെ പെണ്‍കുട്ടികള്‍ എന്നതാണ് യുവാക്കളും വീട്ടുകാരും ഇതിന് കാരണമായി പറയുന്നത്. പാശ്ചാത്യരാജ്യത്ത് ജനിച്ചുവളര്‍ന്ന പെണ്‍കുട്ടികളെ ഭാര്യയായി വേണ്ട എന്നതാണ് ഇവരുടെ സമീപനം. എന്നാല്‍ ഇതുമൂലം ലണ്ടനിലും മറ്റും ജനിച്ചുവളര്‍ന്ന ഇന്ത്യന്‍ പാക് പെണ്‍കുട്ടികള്‍ക്ക് ഏഷ്യന്‍ യുവാക്കളെ ആരെയും ഭര്‍ത്താവായി ലഭിക്കാത്ത സാഹചര്യമാണുള്ളത്. ഇംഗ്ലണ്ടിലേക്ക് വിവാഹം കഴിച്ചെത്തുന്ന ഇന്ത്യന്‍ പാക് പെണ്‍കുട്ടികളാവട്ടെ, പാശ്ചാത്യ സംസ്‌കാരം ഉള്‍ക്കൊള്ളാനാവാതെ ബുദ്ധിമുട്ടുകയും ചെയ്യുന്നു. ഇംഗ്ലീഷ് അറിയാതെ, ഇംഗ്ലണ്ടിലെ സംസ്‌കാരം അറിയാതെ അവര്‍ വര്‍ഷങ്ങളോളം ഒറ്റപ്പെട്ടജീവിതം നയിക്കേണ്ടിവരുന്നു-ഷെയ്ഖ് ജമില്‍ ഒരു ലേഖനത്തില്‍ പറയുന്നു.ഈ പ്രശ്‌നങ്ങള്‍ ഒഴിവാക്കാനായി ഇന്ത്യന്‍ പാക് മുസ്ലീം യുവാക്കള്‍ ഇംഗ്ലണ്ട്, സ്‌കോട്ട്‌ലന്‍ഡ്, അയര്‍ലണ്ട് എന്നിവിടങ്ങളില്‍ ജനിച്ചുവളര്‍ന്ന ഇന്ത്യന്‍ പാക് പെണ്‍കുട്ടികളെ മാത്രമേ വിവാഹം കഴിക്കാവൂ എന്ന് ഷെയ്ഖ് ഓര്‍മ്മിപ്പിക്കുന്നു.അടുത്തകാലത്ത് തന്റെയടുത്ത് ഇംഗ്ലണ്ടില്‍ ജനിച്ചുവളര്‍ന്ന ഇന്ത്യന്‍ പാക് പെണ്‍കുട്ടികള്‍ വിവാഹപ്രായമായിട്ടും വരന്മാരെ ലഭിക്കാതെ ദുഃഖിതരായി ചികിത്‌സയ്‌ക്കെത്തുന്നുണ്ടെന്നും ഇയാള്‍ വെളിപ്പെടുത്തുന്നു. അതുകൊണ്ട്, ഇംഗ്ലണ്ടില്‍ ജനിച്ചുവളര്‍ന്ന പെണ്‍കുട്ടികളെത്തന്നെ വിവാഹം കഴിക്കുക. പങ്കാളികള്‍ക്കു രണ്ടുപേര്‍ക്കും ഇംഗ്ലീഷും ഇംഗ്ലീഷ് സംസ്‌കാരവും അറിയാവുന്നതുകൊണ്ട് കുട്ടികളെ വളര്‍ത്താനും എളുപ്പമാണെന്ന് ഇദ്ദേഹം പറയുന്നു.
സ്വീഡനില്‍ ഒരു വലിയ ജംബോജറ്റ്‌ വിമാനമാണ്‌ ഹോട്ടലായി മാറിയത്‌. സ്വീഡന്റെ തലസ്‌ഥാനമായ സ്‌റ്റോക്‌ഹോമിലെ അര്‍ലാന്‍ഡ എയര്‍പോര്‍ട്ടിനുള്ളിലെ ചെറിയൊരു കുന്നിന്‍മുകളിലാണ്‌ ഹോട്ടലായി മാറിയ ജംബോജെറ്റ്‌ സ്‌ഥാപിച്ചിരിക്കുന്നത്‌. സിംഗപ്പൂര്‍ എയര്‍ലൈന്‍സിന്റെ ബോയിങ്‌ 747 ആണ്‌ രൂപം മാറി ഹോട്ടലായത്‌. 25 മുറികളുള്ള ഹോട്ടലാണിപ്പോള്‍ ഈ ആകാശപേടകം.ആസ്‌ട്രേലിയക്കാരനായ ഓസ്‌കാര്‍ ഡയസാണ്‌ ഈ പുതിയ കാല്‍വെയ്‌പിനു പിന്നില്‍.
പുതുമയുള്ള എന്തെങ്കിലും ചെയ്യണമെന്നു കരുതിയിരിക്കുമ്പോഴാണ്‌ സിംഗപ്പൂര്‍ എയര്‍ ലൈന്‍സിന്റെ പക്കല്‍നിന്നും സ്വീഡനിലെ ഒരു കമ്പനി വാങ്ങിയ വിമാനത്തെക്കുറിച്ച്‌ കേട്ടത്‌. ആ കമ്പനി കടത്തില്‍ മുങ്ങിനില്‍ക്കുകയായിരുന്നു. അങ്ങനെ അവരുടെ പക്കല്‍നിന്നും വിമാനം വാങ്ങി. ഒരു വര്‍ഷമെടുത്തു ഉള്‍ഭാഗം നവീകരിച്ച്‌ ഹോട്ടലാക്കിമാറ്റാന്‍. കോക്‌പിറ്റിലടക്കം ബെഡുകളുണ്ട്‌. വാടക ഒരു രാത്രിക്ക്‌ 50 ഡോളര്‍ മുതല്‍.വെളുപ്പിനെ എയര്‍പ്പോര്‍ട്ടില്‍ നിന്ന്‌ വിവിധ ദേശങ്ങളിലേക്ക്‌ തുടര്‍യാത്ര നടത്തേണ്ടവര്‍ക്ക്‌ വലിയ അനുഗ്രഹമാണ്‌ ഈ വിമാനഹോട്ടല്‍. വൈകി ഉണര്‍ന്നാല്‍ മതി, ട്രാഫിക്കിന്റെ പ്രശ്‌നങ്ങളൊന്നുമില്ലാതെ വിമാനം പിടിക്കാം - ഇങ്ങനെ പല ഗുണങ്ങള്‍. ഏതായാലും ഹോട്ടല്‍ ഉദ്‌ഘാടനത്തിനുശേഷം ഇതുവരെ എല്ലാ മുറികളും എപ്പോഴും ബുക്ക്‌ഡ്‌ ആണ്‌.
ലിവ്‌' എന്നാണ്‌ ഹോട്ടലിന്റെ പേര്‌. സ്വിഡീഷ്‌ ഭാഷയില്‍ `ലിവ്‌' എന്നാല്‍ ജീവിതം എന്നാണര്‍ത്ഥം. ഓസ്‌കാറിന്റെ മൂന്നുവയസുകാരിയായ മകളുടെ പേരുകൂടിയാണ്‌ ലിവ്‌.അടുത്തവര്‍ഷത്തിനുള്ളില്‍ ലോകത്തിലെ പത്ത്‌ വിമാനത്താവളങ്ങളില്‍ക്കൂടി വിമാനഹോട്ടല്‍' തുറക്കാനാണ്‌ ഓസ്‌കാറിന്റെ പരിപാടി. അടുത്തത്‌ ആസ്‌ട്രേലിയയിലായിരിക്കും
മൂവാറ്റുപുഴ: അമ്പത്തെട്ടാം വയസില്‍ അമ്മയാകാനുളള ഭാഗ്യം ലഭിച്ച ആഹ്‌ളാദത്തിലാണ്‌ സിസിലി. മൂവാറ്റുപുഴ സെന്റ്‌ ജോര്‍ജ്‌ ആശുപത്രിയില്‍ തിങ്കളാഴ്‌ചയാണ്‌ ടെസ്‌റ്റ് ട്യൂബ്‌ ചികിത്സാരീതിയിലൂടെ സിസിലി ഒരു ആണ്‍കുഞ്ഞിനു ജന്മംനല്‍കിയത്‌. ഈ പ്രായത്തില്‍ അമ്മയാകുന്നത്‌ അത്യപൂര്‍വമാണെന്നും കേരളത്തില്‍ ഇതിനുമുമ്പ്‌ ഇത്തരം കേസുകള്‍ രണ്ടെണ്ണമേ റിപ്പോര്‍ട്ട്‌ ചെയ്‌തിട്ടുള്ളൂവെന്നും ചികിത്സയ്‌ക്കു നേതൃത്വം നല്‍കിയ പ്രശസ്‌ത ഗൈനക്കോളജിസ്‌റ്റ് ഡോ. സബൈന്‍ പറഞ്ഞു. 2.3 കിലോഗ്രാം തൂക്കമുളള കുഞ്ഞ്‌ സുഖമായിരിക്കുകയാണ്‌. രണ്ടു ദിവസത്തിനുശേഷം ഇവര്‍ ആശുപത്രിവിടുമെന്ന്‌ ആശുപത്രി മേധാവി ഡോ. പോള്‍ കല്ലുങ്കല്‍ പറഞ്ഞു. തൊടുപുഴ കലയന്താനി കാഞ്ഞിരപ്പാറയില്‍ ജോര്‍ജിന്റെ ഭാര്യയാണ്‌ സിസിലി. ആദ്യംപിറന്ന കുഞ്ഞിന്‌ തലച്ചോറിലുണ്ടായ അസുഖം മൂലം മൂന്നുവയസ്‌ മാത്രമേ ആയുസ്‌ ലഭിച്ചുള്ളൂ. 2008-ല്‍ തൊമ്മന്‍കുത്ത്‌ ജലപാതത്തില്‍ വീണ്‌ 16 വയസുള്ള രണ്ടാമത്തെ മകനെയും നഷ്‌ടപ്പെട്ടു. ഒരു കുഞ്ഞു വേണമെന്ന ആഗ്രഹം തോന്നിയപ്പോള്‍ പ്രായം തളര്‍ത്തിയിരുന്നെങ്കിലും ഇവര്‍ നിശ്‌ചയദാര്‍ഢ്യത്തോടെ ഡോക്‌ടറെ സമീപിക്കുകയായിരുന്നു. തുടര്‍ന്നാണ്‌ ടെസ്‌റ്റ് ട്യൂബ്‌ സാങ്കേതികവിദ്യയിലൂടെ സിസിലി ഗര്‍ഭിണിയായത്‌. എറണാകുളം ലക്ഷ്‌മി ആശുപത്രിയിലാണ്‌ ബീജാണ്ഡങ്ങളുടെ സങ്കലനം ടെസ്‌റ്റ് ട്യൂബിലൂടെ നടത്തിയത്‌. തുടര്‍ന്നുളള ചികിത്സകളാണ്‌ സെന്റ്‌ ജോര്‍ജ്‌ ആശുപത്രിയില്‍ നടത്തിയത്‌. ശസ്‌ത്രക്രിയ വരെയുളള ചികിത്സകള്‍ക്ക്‌ എല്ലാംകൂടി ഒരുലക്ഷം രൂപയേ ചെലവു വന്നുളളൂ എന്ന് ഡോക്‌ടര്‍മാര്‍ പറഞ്ഞു. കടപാട് : മംഗളം
അറുപത്തിയാറുകാരന് പത്താംക്ലാസ് പരീക്ഷയില്‍ റെക്കോര്‍ഡ് തോല്‍വി. ഉത്തര്‍പ്രദേശിലെ ഒരു ഗ്രാമീണനായ ജബ്ബാന്‍ ഹൂസൈനാണ് തോല്‍വിയില്‍ റെക്കോര്‍ഡിട്ടിരിക്കുന്നത്. ഇക്കാലത്തിനിടെ 45തവണയാണ് ജബ്ബാര്‍ പരീക്ഷയില്‍ തോറ്റത്. ഈ വര്‍ഷം നാല്‍പ്പത്തിയഞ്ചാമത്തെ തോല്‍വി രുചിച്ചിട്ടും മുന്നോട്ടുവച്ചകാല്‍ പിന്നോട്ടില്ലെന്നാണ് ജബ്ബാന്‍ പറയുന്നത്. ജയിക്കുന്നതെന്നാണോ അതുവരെ പരീക്ഷയെഴുതാന്‍ തന്നെയാണ് ജബ്ബാറിന്റെ തീരുമാനം. ഫത്തേപ്പൂര്‍ ജില്ലയിലെ ബിന്ദ്കി ഗ്രാമത്തില്‍ പലചരക്കുകച്ചവടം നടത്തുകയാണ് ജബ്ബാര്‍, ഇതിനിടെയാണ് പഠനവും പരീക്ഷയുമെല്ലാം. പത്താം ക്ലാസിലെ ആറ് വിഷയങ്ങളില്‍ മൂന്നെണ്ണത്തിലാണ് ജബ്ബാര്‍ തോറ്റിരിക്കുന്നത്. ഉത്തര്‍ പ്രദേശ് മധ്യമിക് ശിക്ഷാ പരിഷത് നടത്തുന്ന പരീക്ഷ എഴുതിയ ഏറ്റവും മുതിര്‍ന്നയാളായിരുന്നു ജബ്ബാര്‍. ഈ വര്‍ഷം തന്നെ പരാജയപ്പെട്ട വിഷയങ്ങള്‍ എഴുതിയെടുക്കാന്‍ ജബ്ബാറിന് കഴിയില്ല. പുതിയ ഗ്രേഡിങ് സമ്പ്രദായപ്രകാരം രണ്ട് വിഷയങ്ങളില്‍ക്കൂടുതല്‍ തോറ്റാല്‍ അവമാത്രം എഴുതി ജയം കാണാനുള്ള വിദ്യാര്‍ത്ഥിയുടെ അര്‍ഹത നഷ്ടപ്പെടും. അതുകൊണ്ട് അടുത്ത അധ്യയനവര്‍ഷം ജബ്ബാര്‍ വീണ്ടും എല്ലാ വിഷയങ്ങളും എഴുതേണ്ടിവരും. പത്താം ക്ലാസ് ജയിക്കുകയെന്നത് എന്റെയൊരു സ്വപ്‌നമാണ്, എത്രതവണ തോറ്റാലും ജയിക്കുന്നവരെ ഞാന്‍ പരീക്ഷയെഴുതും. ഒരു ദിവസം ഞാന്‍ ജയിക്കുമെന്ന് എനിക്കുറപ്പുണ്ട്-ജബ്ബാര്‍ പറയുന്നു.
